Поделиться
"Автор изы, афырхаҵа изы еиҧш, илахьынҵа дахьнанагалак, акраҵанакуа ишыҟаз иаанхоит агәхьаагара рахәыц иахылҵуа абжьы, лассы-лассы лацәеихьшьра умҭакәа, ашәымҭак уанаазыӡырҩлак, урҭ ашьха ҵышлаақәа, амра, амшын, абзиабара, аиҩызара ахьыҟоу - Аҧсынтәыла ҳәа хьӡыс измоу адунеи ссир ашҟа ухынҳәуеит гәаныла". – Абас поезиатә ҟазшьала ишәҟәы зызку дахцәажәоит Владимир Делба. Ашәҟәы ацәа иану асахьа авторс дамоуп аҧсуа сахьаҭыхҩы Саид Возба. Владимир Делба ари аусумҭа аниба, асахьаҭыхҩы анапҩымҭа даҧхьаны, асиужет аепизодк дақәшәаны иааирҧшызшәа аҟара игәы иабеит, иара ихаҭа излаиҳәо ала. Владимир Делба – урысшәала иҩуа аҧсуа прозаикуп, поетуп, ессеиступ, Аҧсны ашәҟәыҩҩцәа рассоциациа, Урыстәыла ашәҟәыҩҩцәа Реидгыла, XXI ашә. ашәҟәыҩҩцәа Реидгыла далахәылаҩуп. 26-тәи Москватәи жәларбжьаратәи 2013 ш. ашәҟәқәа рцәыргақәҵа-џьырмыкьа адипломантуп, "Урыстәыла акультуреи аҟазареи рзы иналукааша аусзуҩы" аноминациаҟны 2014 шықәсазтәи Аҳәынҭқарратә стипендиатуп. Иара убас уи сахьаҭыхҩы-иллиустраторуп, СССР, Аҧсны асахьаҭыхҩцәа Реидгылеи Иунеско асахьаҭыҩцәа жәларбжьаратәи рфедерациеи дрылахәылаҩуп. 2012 шықәсазы Аҟәа иҭыжьын раҧхьатәи ишәҟәы – " Аҟәатәи астереоскоп", ҩышықәса рышьҭахь ихәыҷра ақалақь асахьа ҭихуеит иаҧҵамҭа "Амра – сқәыҧшра аҕба" аҟны. Ари ашәҟәы автор 2014 ш. Жәларбжьаратәи аконкурс «Аамҭақәа реимадара» аҟны автор аиааира инаргеит. Аноминациа «Арҿиаратә ҧшаара» аҟны – актәи аҭыҧ. «Аҧсны, сара сыҧсы атәыла…» - аҧшьбатәи шәҟәуп. 2015 шықәсазы, лыҵшәа бзиала арҿиаратәи ауаажәларратәи усуреи рзы Владимир Делба ианашьоуп АА Ахада Иџьшьабҕьыц. 2016 шықәса хәажәкыра аказы аихшьала ҟаҵоуп Апремиа «ХХI шәышықәсазтәи ашәҟәыҩҩы» Аконкурс. Владимир Делба, “Шорт-Лист” Апремиа иалалаз автор иаҳасабала, ианашьан ажиури идиплом. 2016 шықәса хәажәкыра хҧа рзы «Алитературатә Газеҭ» аҟны икьыҧхьын А. Дельвиг ихьӡ зху “Лонг-Лист” Апремиа. Ара иара убас Владимир Делба ижәла арбан.
коммент.